Старите јогини изумиле многу начини за релаксирање, на кои модерните јога учители, на основа на своите искуства додале и свои методи. Мора да потенцираме дека автентичните учители тежат кон постигнување на внатрешен мир преку лично, морално прочистување, при што основа за опуштање претставува ослободување од негативните мисли, нечистотии и болести, кои се всушност најголема препрека за наше здравје и среќа. Длабоко воденото опуштање ги враќа мирот, рамнотежата и радоста во нашите животи.

Во релаксацијата телото мирува, а целта е свесно насочување на внимание на одредени делови на телото и нивно свесно опуштање. Свесното опуштање е уште познато како јога нидра, или техника на препуштање, која всушност претставува усмерено отстранување на напнатоста.

Се прави во позата шавасана, идеално е да се направи после вежбањето асани, бидејќи го урамнотежува, обновува и енергизира целото тело, ја ублажува анксиозноста, ја отстранува напнатоста и заморот, ја нормализира циркулацијата на кислород. Во моментите на релаксација дишењето е успорено, исчезнуваат стресот и тежината, се појавува мир и леснотија со чувството дека телото е исполнето со свежа и нова енергија (прана).